पोखराको फेवातालमा डुङ्गा पल्टिदा एकको मृत्यु

पोखरा :  पोखराको फेवातालमा डुङ्गा पल्टिदा एक महिलाको ज्यान गएको छ । शनिबार अपराह्न  ४ बजे भएको घटनामा पोखरा -१ बगर निवासी ७० वर्षीया याम माया गिरीको ज्यान गएको हो ।

डुङ्गा पल्टिएपछि गम्भीर अवस्थामा उद्धार गरिएकी गिरीलाई हस्पिटल लगिएकोमा चिकित्सकले उपचारको क्रममा मृत घोषणा गरेको कास्की प्रहरी प्रवक्ता डिएसपी ​श्रवण कुमार विकले जानकारी दिए।

वडा प्रहरी कार्यालय बैदामका प्रहरी प्रमुख, डिएसपी बेद जोशीका अनुसार  शनिबार अचानक आएको हावाहुरीका कारण ६ जना सवार डुङ्गा पल्टिएकोमा अन्य ५ जना सकुशल रहे पनि डुङ्गा मुनि परेकी गिरीलाई गम्भीर अवस्थामा उद्धार गरिएको थियो ।

डिएसपी जोशीले भने, ‘डुंगामा एकै परिवारका ६ जना सवार रहेकोमा अन्य सकुशल हुनुहुन्छ । डुंगाको मुनि पर्नुभएकी याम माया गिरीलाई प्रहरीसहितको टोलीले गम्भीर अवस्थामा उद्धार गरेर हस्पिटल लगेको हो।’

शनिबार नै तालमा कायाक गरेका चार जना समेत दुर्घटनामा परेका थिए ।   उनीहरूलाई एपीएफको टोलीले सकुशल उद्धार गरेको छ ।