जिप दुर्घटनामा परी ज्यान गुमाउने संख्या ६ पुग्यो, ८ घाइते

बन्दीपुर:तनहुँको बन्दीपुरमा भएको सवारी दुर्घटनामा परी ज्यान गुमाउनेको संख्या ६ पुगेको छ । बन्दीपुर गाउँपालिका–६ धरमपानी हटियामा शुक्रबार राति साढे ८ बजे दुर्घटना भएको प्रहरीले जनाएको छ । दुर्घटनामा ८ जना घाइते भएका छन् ।

घुमाउनेबाट धरमपानी आउदै गरेको ग १ ज ६५५५ नम्बर जिप सडकबाट अन्दाजी एक सय मिटर तल खस्दा दुर्घटना भएको हो ।

दुर्घटनामा मृत्यु हुनेमा ९ महिने बालिका आरुबी थापा, २४ वर्षीय रोशन गुरुङ, ४२ वर्षीया सुशीलादेवी न्यौपाने, ५३ वर्षीय हरिबहादुर न्यौपाने, ७६ वर्षीया भीममाया गुरुङ र ४३ वर्षीया सुकबहादुर गुरुङ रहेका छन् ।

बन्दीपुर अस्पतालका अनुसार विममाया र सुकबहादुरको अस्पताल ल्याउँदै गर्दा बाटोमा र अन्य चार जनाको घटनास्थलमै मृत्यु भएको जनाइएको छ ।

घाइते सबैको बन्दीपुर अस्पतालमा सामान्य उपचारपश्चात् थप उपचारका लागि चितवन रिफर गरिएको प्रहरीले जनाएको छ ।